கோவி.கண்ணனும், நையாண்டியும் - சிக்கலின் நான்

முன்னணி பதிவர்களான திரு கோவி.கண்ணன் அவர்களும், திரு நையாண்டி நைனா அவர்களும் இந்த மல்டி லெவல் மார்க்கெட்டிங்கில் என்னையும் மாட்டி விட்டிருக்கிறார்கள். எல்லாம் போட்டு வாங்குறதுக்குன்னு மட்டும் நல்லா தெரியுது.

படிக்கிறவங்க கண்ணுல இரத்தக்கண்ணீர் வந்தால் தொடர்பு கொள்ள வேண்டிய இடம் கோவி.கண்ணன் மற்றும் நையாண்டி நைனா என்பது நான் சொல்லி உங்களுக்குத் தெரியவேண்டியதில்லை!

முன்னணி கலைஞரான கலைஞர் மு.கருணாநிதி போன்றவர்கள் திரு மோகன் கந்தசாமி போன்றவர்களுக்கு செவ்வி வழங்கியிருக்கும் போது என்னுடைய செவ்வி பின்னணி செவ்வியாக மட்டுமே பார்க்கப் படும் என்பது திண்ணம்.

1.உங்களுக்கு ஏன் இப்பெயர் வந்தது? உங்களுக்கு உங்க பெயர் பிடிக்குமா?
இந்தக் கேள்வியெல்லாம் சாதனை பண்ணுனவங்க கிட்ட கேக்கணும். சோதனை பண்ணுறவங்களுக்கிட்ட கேட்கக்கூடாது.
என் தந்தை எனக்கு சோதிபாரதி என்று பெயரிட்டார்(அவருடைய தமிழ் பற்று). குழந்தையாக இருக்கும் போது என் தாய் சுப்பிரமணிய பாரதி என்றழைத்து மகிழ்ந்தார். பிற்காலத்தில் நான் ஜோதிபாரதி என்று மாற்றிக் கொண்டேன். உச்சரிப்புப் பிழை பொருட்பிழை ஏற்பட்டுவிடக் கூடாது என்கிற நல்ல நோக்கத்தில்...! மற்றபடி யாரையும் சோதிக்க வேண்டும் என்கிற எண்ணம் எனக்குக் கிடையாது.

2.கடைசியாக அழுதது எப்போது..?
இப்போதெல்லாம் மரத்துப் போன இதயங்களை உடையவர்களைக் கண்டு என் கண்கள் கூட அழ மறுத்துவிடுகின்றன, மனம் மட்டும் அழுகையை நிறுத்தாத போது...!

3.உங்களோட கையெழுத்து உங்களுக்குப் பிடிக்குமா?
கையெழுத்து அழகாக இருக்கிறது என்று எல்லோரும் சொல்கிறார்கள். எழுதும் போது ரசித்து எழுத வேண்டும் என்பது எனது விருப்பம்.(கையெழுத்து நல்லா இருந்தா தலைஎழுத்து நல்லா இருக்காது போன்ற உரையாடல்களை நம்புவதில்லை)

4.பிடித்த மதிய உணவு..
எல்லா சைவ உணவுகளையும் விரும்பி சாப்பிடுவேன். பரங்கிக்காய் மட்டும் பிடிக்காது.அசைவ உணவுகளில், நண்டு வறுவல் பிடிக்கும், இறால், விரா மீன், வாளை மீன் பிடிக்கும். மட்டன் பிடிக்கும், நம் தமிழகத்தில் மட்டும் தான். சிங்கையில்ஆட்டுக்கறி( மட்டன்) சாப்பிட அவ்வளவாக பிடிப்பதில்லை. சிங்கையில் ஒரு குறிப்பிட்ட உணவகங்களில் ஆட்டுக்கறி நன்றாக இருக்கும்.மாற்றான் தோட்டத்து மல்லிகைக்கும் மனம் உண்டு என்கிற படியால், சீன உணவில் லக்சா, பிஷ் சூப், பிஷ் பால் நூடுல்ஸ் இன்னபிற உணவு வகைகள் பிடித்தமானது.

5.நீங்கள் வேறுயாருடனாவது உங்களோட நட்பை உடனே வச்சுக்குவீங்களா?
என்னைப் பார்த்தவுடன் பழக வேண்டும் போல் இருக்கிறது என்று சிலர் சொல்லி இருக்கிறார்கள். அதேபோல் தான் நானும்...! வாங்க பழகலாம் என்னும் பிளாஸ்டிக் பழக்கம் எனக்கு ஒத்து வராது.

6.கடலில் குளிக்கப் பிடிக்குமா? அருவியில் குளிக்கப் பிடிக்குமா?
கடலும் அருவியும் எங்க வீட்டுக்கு பக்கத்துல இல்லை. எனக்குப் பிடித்தாலும் அதனால் எனக்கு பெரிய பலன் ஒன்றும் இல்லை. சுற்றுலா சென்றால் அருவியில் குளிக்கத்தான் பிடிக்கும்.

7.முதலில் ஒருவரைப் பார்க்கும் போது எதைக் கவனிப்பீர்கள்..
முகத்தை, கண்ணைப் பார்த்து பேசுவதே முறையாகும். அதுதான் எனக்கும் பிடிக்கும். மண்ணைப் பார்த்து பேசும் பெண்ணானாலும் கண்ணைப் பார்க்கவே விரும்புவேன்.

8.உங்க கிட்ட உங்களுக்கு..பிடித்த விஷயம் என்ன..பிடிக்காத விஷயம் என்ன?
பிடித்தது: ஓரளவுக்கு உண்மையை மட்டுமே பேச வேண்டும் என்று நினைப்பது, முடிந்தவரை அதைக் காப்பாற்றி வருவது.
எழும்பூரில் காத்திருப்பவரிடம், நான் இந்தா வந்துடுவேன் சைதாபேட்டை வந்துட்டேன் என்று தாம்பரத்தில் இருந்து கொண்டு சொல்வது எனக்குப் பிடிக்காது.
பிடிக்காதது: ஒன்பது வேலைகளை ஆற போட்டுவிட்டு பத்தாவது வேலை வந்தவுடன் அதனையும் சேர்த்து சோறு, தூக்கம் எதுவும் பாராது ஒரே மூச்சில் முடிக்க நினைப்பது.

9.உங்க சரிபாதி கிட்ட உங்களுக்கு பிடித்த,பிடிக்காத விஷயம்..
பிடித்த விசயம் : நாம் மறந்த பலவற்றை ஞாபகம் வைத்திருப்பது. நோட்டு புத்தகம் வாங்குற செலவு மிச்சம்.
பிடிக்காத விசயம் : நாம் தெரிவிக்கும் கருத்துகளை பெரும்பாலும் ஆமோதிப்பது.

10.யார் பக்கத்தில் இல்லாம இருக்கறதுக்கு வருந்துகிறீர்கள்?
ஒரு சில மனிதர்களுடன் வாழும் வாய்ப்பு கிட்டியிருப்பதால் அந்த வருத்தம் இதுவரை ஏற்படவில்லை. இருப்பினும் நம் உறவுகள் அனைவரையும் விட்டுவிட்டு சிங்கை போன்ற இயந்திர உலகில் வாழ்வதற்கு யாருக்குத் தான் பிடிக்கும்.

11.இதை எழுதும்போது என்ன வர்ண உடை அணிந்துள்ளீர்கள்?
இந்த கேள்வியை கேட்டவர் என்னை காதலிக்க விரும்புகிறாரா? நான் திராவிட பாரம்பர்யத்தில் வந்த மஞ்சள் சட்டையும் போடவில்லை, அண்ணாயிசத்தை குழைத்த பச்சை கலர் சிங்குஜாவும் இல்லை. கருப்புதான் எனக்கு பிடிச்ச கலரு.

12.என்ன பாட்டு கேட்டுக் கொண்டிருக்கிறீங்க..
பாட்டா? என் பாட்டையே நீங்க கேட்பீங்களா என்று தெரியவில்லை. இதுல நான் கேட்டுக் கொண்டிருக்கும் பாடல் வேறா?

13.வர்ண பேனாக்களாக உங்களை மாற்றினால் என வர்ணமாக உங்களுக்கு ஆசை?
தொடர்ந்து தட்டச்சு மட்டும் செய்வதால், பேனாவாக ஆனால் எனக்கு இரண்டு வேலைதான். இருப்பினும் பேனாக்களிடம் ஏன் நிற வெறி காட்ட வேண்டும் என்பது எனது கேள்வி. தொடர்ந்து நிறம் சம்பந்தப் பட்ட கேள்விகளையே கேட்டுக் கொண்டு வருவதால், கேள்விகளைக் கேட்டவர் நிற வெறியுடையவரோ என சந்தேகிக்கிறேன்.

14.பிடித்த மணம்..
தமிழ் வாசம் வீசும் மணம் மட்டுமல்ல மானமும், மனமும் கூட பிடிக்கும்.

15.நீங்க அழைக்க விரும்பும் பதிவரிடம்..உங்களுக்கு பிடித்த விஷயம்..அவரை அழைக்கக் காரணம்..
"டொன் லீ" சிவா தயாளன் - எமது ஈழத்து உறவு, நகைச்சுவையாக எழுதுவதில் வல்லவர்.
"நிஜமா நல்லவன்" பாரதி - கவிதைகள் எழுதுவார், பின்னூட்டங்களின் பின்னிப் பெடலெடுப்பவர், வாசிப்பு தேடல் உடையவர்.
"பித்தன்" விஜய் - மேன்மையான சீரிய கருத்துகளை கூரிய சொற்களால் கட்டமைப்பார். வாசிப்பை நேசிப்பாய் கொண்டவர்.

16.உங்களுக்கு இதை அனுப்பிய பதிவரின் பதிவில் உங்களுக்கு பிடித்த பதிவு..
இதை அனுப்பிய திரு கோவியார் எண்ணற்ற பதிவுகள் எழுதியுள்ளதால் எதை விடுப்பது எதைத் தொடுப்பது என்று தெரியவில்லை. கோவி கண்ணன் அவர்களின் பெரும்பாலான பதிவுகள் பிடித்தவையே!

இன்னொரு பதிவரான திரு நையாண்டி நைனா அவர்களின் பதிவுகளும் பெயருக்கேற்றாற்போல் நகைச்சுவை ததும்ப இருக்கிறது. பெரும்பாலான இவரது பதிவுகளும் எனக்கு பிடித்தவையே!

17.பிடித்த விளையாட்டு...
கிரிக்கெட் என்னும் பணக்கார விளையாட்டு அல்ல.

18) கண்ணாடி அணிபவரா?
ஏன் வயது 40 ஆகிவிட்டதா என்று தெரிந்து கொள்ள முயற்சி செய்கிறீர்களா? இல்லை.

19).எப்படிப்பட்ட திரைப்படம் பிடிக்கும்...
இயல்பான, நகைச்சுவைகளை உள்ளடக்கிய படமும் பிடிக்கும். பிரமாண்டமும் பிடிக்கும். ஏன் உங்களுக்கு திரைப்பட தயாரிப்பாளர் ஆக வேண்டும் என்கிற ஆசையா? அதற்கான கருத்துக் கணிப்பு போல் தெரிகிறதே, அதான் கேட்டேன்.

20.கடைசியாக பார்த்த படம்..
இப்போது ஏதும் பார்க்க வில்லை. சென்ற ஆண்டு பார்த்தது சேரனின் மாயக்கண்ணாடி. நீங்க படம் எடுக்கனும்னு நினைத்தால் சேரனை வைத்து எடுங்கள் அல்லது சீமானை வைத்து எடுங்கள்.

21.பிடித்த பருவ காலம்...
தை - அதுதான் தமிழனின் திருநாள் தொடங்கும் மாதம், அறுவடை செய்து அனைவரும் மகிழ்ச்சியாக இருக்கும் காலம்..

22.இப்போது படித்துக் கொண்டிருக்கும் புத்தகம்?
தமிழர் அடிமையானது ஏன்? எவ்வாறு? - க.ப.அறவாணன் எழுதியது பலருக்கு பயன் படாத புத்தகம், எனக்காவது பயன்படுகிறதா என்று பார்ப்போம் என்ற ஒரே நம்பிக்கையோடு படிக்கிறேன்.

23.உங்க டெஸ்க் டாப்பில் இருக்கும் படத்தை எத்தனை நாளைக்கு ஒரு முறை மாற்றுவீர்கள்?
கணக்கு பண்ணி மாற்றுகிற நிரந்தர வேலையெல்லாம் கிடையாது. பெரும்பாலும் குழந்தைகளின் படங்களை போடுவது உண்டு. தற்போது போட்டிருப்பது என் மகன் நரேன் அவர்கள் தமிழ் புத்தாண்டு நிகழ்ச்சியில் பாரதியார் வேடமிட்ட படம்.

24.உங்களுக்கு பிடித்த சத்தம்...பிடிக்காத சத்தம்...
பிடித்த சத்தம் : அழகின் சிரிப்பு
பிடிக்காதது: அவசர வேலையாக இருக்கும் போது தெரிந்தே நம்மை அழைக்கும் சத்தம்.

25.வீட்டை விட்டு சென்ற அதிகபட்ச தொலைவு ?
சிங்கப்பூர் - மலேசியா

26.உங்களுக்கு ஏதேனும் தனித்திறமை இருக்கிறதா?
தனித் திறமைகள் ஏதும் இருப்பதாகத் தெரியவில்லை. இனிமேல் இருப்பதாக யாரவது சொன்னாலும் ஆச்சர்யப் படுவதற்கில்லை.

27.உங்களால் ஏற்றுக் கொள்ளமுடியா ஒரு விஷயம்..
ஓரிடத்தில் மக்கள் படுகொலை செய்யப்பட்டால் அது இயற்கை என்று கூறிவிட்டு, இன்னொரு இடத்தில் வெறும் தாக்குதலுக்கு நீலிக் கண்ணீர் வடிக்கும் தன்மையும் போக்கும்.

28.உங்களுக்குள் இருக்கும் சாத்தான்..
சாத்தான் மீதெல்லாம் நம்பிக்கை இல்லாததால், நம்பிக்கை உள்ளவர்களிடம் இந்த கேள்வியை கேட்டிருந்தால் நலம்.

29.உங்களுக்கு பிடித்த சுற்றுலாத்தலம்..
நான் போன இடங்களில் குற்றாலம் பிடித்தது.

30.எப்படி இருக்கணும்னு ஆசை..
எப்படி இருந்தவன் இப்படி ஆயிட்டேன் என்று சொல்லாத நிலை வேண்டும் என்று நினைக்கிறேன். போதும் என்ற மனமே பொன் செய்யும் மருந்து.

31.கணவர்/மனைவி இல்லாம செய்ய விரும்பும் காரியம்...
சமைப்பது - அது இல்லை என்றால் வேலைக்கு ஆகாது.
அவர்கள் இருக்கும் போது சமைக்க விரும்பினால் அவர்கள் சமைக்க விடுவதில்லை. நாம் சமைப்பது பிடிக்கவில்லை என்று சொல்வதுமில்லை. நன்றாக இருக்கிறது என்று மட்டும் கிளி பிள்ளை மாதிரி சொல்லிக் கொண்டிருப்பார்கள்.

32.வாழ்வு பற்றி ஒருவரி சொல்லுங்க..
காஞ்சி காம கோடி பீடாதிபதி போன்ற ஆட்கள் சொன்னா நம்புவீங்க. நான் சொன்னா நம்புவியளா? இருந்தாலும் சொல்றேன்,
கட்டுமரம்! வாழ்க்கை என்பது ஓடம் என்று சொல்வார்கள். நம்பாதீர்கள்.

கவிஞர் மலர்விழியின் கருவறைப் பூக்கள் - கவிதைத் தொகுப்பு வெளியீடு

கருவறைப் பூக்கள் - கவிதைத் தொகுப்பு வெளியீடு

கெழுதகை நட்பும், விழுமிய சுற்றமும் காணக்கிடைக்கும் இலக்கிய நிகழ்வுகளில், கவிமாலை, கவிச்சோலைகளில் என்று யாம் விருபினாலும் அரிதாகக் கலந்து கொள்ளும் நிலை தான் இன்றும்,

"உத்தியோகம் புருஷலட்சணம்"(இல்லத்தரசனுக்கு வேலை அழகு) எனும் ஆணாதிக்கச் சொற்றொடர் புலம் பெயர்ந்த வாழ்க்கையில் பொய்யாகிக் கொண்டிருக்கும் காலத்தில்,

சாதிகள் இல்லையடிப் பாப்பா குலத் தாழ்ச்சி உயர்ச்சி சொல்லல் பாவம் இந்த பாரதியின் பாடலை குழந்தைகளுக்குக் கற்றுக் கொடுக்க பயந்து கொண்டிருக்கும் காலம். சாதி என்றால் என்ன? குழந்தைகள் கேட்டால்?

உறவுகள், நண்பர்களின் குரல்களை கைப்பேசியின் ஒலிபெருக்கியில் மட்டுமே கேட்டுக் கொண்டு அவசர கோலம் அள்ளித் தெளிக்கும் மாவு என்றில்லாமல்,

மெல்லத்தமிழினி சாகும் என்பவர்களுக்கு, மெல்லத்தமிழினிதாகும் என்று செவியில் ஒலி எழுப்பிக் கொண்டிருக்கும் தமிழ்ப் பண்பாட்டு, இலக்கிய நிகழ்வுகள்.

அந்த வகையில் சிங்கப்பூர் கவிஞர் திருமதி மலர்விழி இளங்கோவன் அவர்களது "கருவறைப் பூக்கள்" முதல் கவிதைத் தொகுப்பு வெளியீடு ஒரு முத்தாய்ப்பு.

புலவர் பாண்டித்துரையும், கவிஞர் மாதங்கியும் விழா பற்றி என்னிடம் முன்னரே தெரிவித்திருந்தார்கள். கவிஞர் அழைப்பிதழ் அனுப்பி இருந்தார். விழாவிற்கு வருகிறேன் என்று வாக்களித்தாயிற்று. சிங்கையில் சீனப் புத்தாண்டுக்கு விடுமுறையாக இருந்தாலும், பெரும்பாலான சீனரல்லாத தமிழர், மலாய்க்காரர்களுக்கு வேலை இருக்கும். அந்தவகையில் எனக்கும் அன்று வேலை இருந்தது. எப்படியும் கலந்து கொள்ளவேண்டும் என்கிற நிலை, வேலை முடிந்ததும் நேராக விழா நடக்கும் இடத்திற்குச் சென்றேன். என்னோடு வர இருந்த டொன் லீ சிவ தயாளன், அதிரை ஜமால் ஆகியோர் வேலையின் காரணமாக வர இயலவில்லை.

படம் அனுப்பிவைத்த புலவர் பாண்டித்துரைக்கு நன்றி!

நான் வந்து சேரும் போது விழா தொடங்கியிருந்தது, சிங்கப்பூரின் வெண்பா சிகரங்களான ஆசியான் கவிஞர் க.து.மு.இக்பால்(தலைமையேற்றிருந்தார்) , பாத்தென்றல் முருகடியான் ஆகியோரின் உரை முடிவுற்றிருந்தது. அன்பிற்குரிய புதுமைத் தேனீ கவிஞர் மா.அன்பழகன் அவர்களும் உரையாற்றி அமர்ந்திருந்தார். திருமதி மலர்விழி இளங்கோவன் எழுதிய கவிதையைப் பாடலாக, தமிழ் வணக்கம் பாடிய காவியா பற்றி மற்றவர்கள் பேசும் போது குறிப்பிட்டார்கள். துளசி இளங்கோவன் நிகழ்ச்சியை நேர்த்தியாக நெறிப்படுத்திக் கொண்டிருந்தார்.

மார்கழிப் பூவைப் பற்றி அழகானப் பாடலை இசையில்லாமல் இசைந்து பாடினார் மருத்துவர் திருமதி உமா இராஜன் அவர்களின் உடன்பிறப்பு சோபா சங்கர், ஏ.ஆர் இரகுமான் இசையமைப்பில் மே மாதம் என்ற திரைப்படத்தில் பாடியவரும் இவரே.


இலக்கியத்தென்றல் கவிஞர் ந.வீ.விசயபாரதி அவர்கள் தென்றலாகத் தமிழ் மணம் வீசிக் கமழச் செய்தார். நூலாய்வு செய்ததைப் போல் ஓர் உணர்வு ஏற்பட்டது.

அடுத்து நூலாய்வு செய்த திரு ஜோதி மாணிக்கவாசகம் அவர்கள் கருவறைப் பூக்களில் உலகியல் என்றத் தலைப்பில் பொருளாதாரத்தைப் புட்டு புட்டு வைத்தார் என்பதை விட வெட்டு ஒன்னு துண்டு ரெண்டு என்று எளிய ரசம் சொட்ட வட்டார வழக்கில் வகைப்படுத்திவிட்டு அமர்ந்தார். தொழில் வியாபாரம் செய்யும் சீனர்கள் சில தமிழ் வார்த்தைகளைக் கற்றுக் கொண்டு நம்மிடம் தமிழ் பேசுவதையும், நம்மவர்கள் தமிழ் ஆங்கிலம் இரண்டும் தெரிந்திருந்தும் நம்மிடத்தில் ஆங்கிலத்தில் பேசி அங்கலாய்ப்பதை வேதனையுடன் பகிர்ந்து கொண்டார். தனது உரையை கவிஞரின் கவிதையில் உள்ளிருத்திய உலகியல், பொருளாதாரம் சார்ந்த சிந்தனையைத் தொட்டுச் சிறப்பித்திருந்தார். வியாபாரத்துறையில் இருப்பவரை இந்தத் தலைப்பில் பேசத் தேர்ந்தெடுத்தது நன்றாக இருந்தது. இடையே அவர் தெரிவித்த குடியரசு தின வாழ்த்துகள் அன்றைய நாளில் அந்நியப்பட்டுப் போனதென்னவோ உண்மை.

அடுத்துப் பேசவந்த திருமதி விஜி ஜெகதீஷ், கருவறைப் பூக்களில் உறவியல் என்றத் தலைப்பில் உறவுகள், பந்தம், பாசம்,ஆணிவேர் போற்றவற்றை அக்குவேறு ஆணிவேராக அலசி நூலாய்வு செய்திருந்தார். இது தனது முதல் நூலாய்வு என்று பெருமைப்பட்டு பெருமைப் படுத்தினார். அதில் புலம் பெயர்தல் என்ற தலைப்பில் வந்த ஒரு கவிதையை இங்கு குறிப்பிட விரும்புகிறேன்.

நாற்று முதிர்ந்து

நாளாகி

நாடு மாற்றி நடவு செய்தாலும்

வேற்று மண் பதிந்து

விருப்புடனே வேர் பிடித்து

வியத்தகு மகசூல் தரும் ...

அவசிய வாழ்வினிலே

ஆணிவேர் தொலைத்த

அதிசய ரகம் நாங்கள்

புலம்பெயர் மக்கள் எந்த ரகம் என்பதை சுட்டாமல் சுட்டி இருக்கிறார் என்பதைவிட குட்டி இருக்கிறார் கவிஞர் என்றுதான் சொல்லவேண்டும். இன்னொரு கவிதை "ஆண்களின் ஆதங்கம்" என்ற தலைப்பில், இதில் ஆணாதிக்கம், பெண்ணியம் இரண்டையும் தராசிலிட்டு நிறுத்து கொடுத்திருக்கிறார். இதற்குமேல் விளக்கினால் அது விமர்சனமாகத் தெரியும். அதனால் இத்துடன் விட்டுவிட்டு நிகழ்ச்சிக்குச் செல்லலாம்.

இந்தக் கவிஞர் தனது கருவறைப் பூக்களைப் பிரசவிக்க ஒரு மருத்துவரை ஏற்பாடு செய்திருக்கிறார். இரண்டு குழந்தைகளுக்குத் தாயாக இருந்தாலும் தனது மூன்றாவது குழந்தையான கருவறைப் பூக்களுக்கு விழா எடுத்துப் பிரசவம். மருத்துவர் திருமதி உமா இராஜன்(நமது ஈழத்துச் சொந்தம்) அவர்கள் நூலை வெளியிட வேதனையில்லாமல் வெளிக்கிட்டது கருவறைப் பூக்கள், பிறந்த குழந்தையின் மழலைச் சத்தம் விண்ணைப் பிளந்து அனைவரையும் ஒரு நிமிடம் குழந்தைகளாக்கிப் பார்த்தது.

அடுத்து, நூலை வெளியிட்ட மருத்துவர் திருமதி உமா இராஜன், தமது உரையில் கவிஞரிடம் உரையாடியதிலிருந்து கற்பனை செய்து வைத்திருந்த கவிஞரை நேரில் பார்க்கும் போது கற்பனை மெய்யானதை புனைவில்லாத  புதுக் கவிதையாகச் சொன்னது நன்றாக இருந்தது. பழக்க தோசத்தில் ஆங்கில வார்த்தைகள் வந்து விடுமோ என்று அச்சப் பட்டது, அதை வெளிப்படையாகச் சொல்லி வெட்கப்பட்டது, என்று சுவையாகச் சென்றது. அவர் தெரிவித்த வாழ்த்துகள் உள்ளக்கிடங்கையில் இருந்து வெளிப்பட்டு ஒப்பனையின்றி மிளிர்ந்தது.

அடுத்து ஏற்புரையாற்றிய கவிஞர் திருமதி மலர்விழி இளங்கோவன் யாருக்கு நன்றி சொல்வதென்று திக்குமுக்காடியதை கண்ணுற முடிந்தது. எனினும் நன்றி சொல்லி உங்களையெல்லாம் அந்நியப்படுத்த விரும்பவில்லை என்று தன்னை ஆறுதல் படுத்திக் கொண்டார். தனது உரையில் கவிஞர் திரு பிச்சினிக்காடு இளங்கோ அவர்கள் தனது படைப்பு ஒன்றை  சிங்கைச்சுடர் மாத இதழில் வெளியிட்டதை நினைவு கூர்ந்தார். பின்னர் அண்ணன் திரு பிச்சினிக்காடு இளங்கோ அவர்கள் மாதந்தோறும் நடத்தும் கடற்கரைச் சாலை கவிமாலையில் கலந்து கொண்டு கவிதைகள் படைத்ததையும், மரபுக் கவிதைப் போட்டியில் பங்கெடுத்ததையும், கவிஞர் ந.வீ.விசயபாரதி அவர்களிடம் இருந்து மரபை வரவாக்கிக் கொண்டதையும் நினைவு கூர்ந்தார். கவிஞர் புதுமைத் தேனீ மா. அன்பழகன் அவர்கள் பற்றியும் தெரிவித்து ஒட்டுமொத்த கவிஞர்களையும் ஒரே குடும்பமாக்கிக் மகிழ்ச்சியை வெளிப்படுத்தினார். தனது கவியார்வத்தை ஊக்குவிக்கும் கணவர் திரு இளங்கோவன், மகன் மதன், மகள் துளசி ஆகியோர் பற்றிக் குறிப்பிடும் போது ஒவ்வொரு கவிதையையும் படித்துவிட்டு முதலில் விமர்சனம் செய்பவர் தனது கணவரே என்றார். இந்த நிகழ்ச்சியை மிகவும் சிறப்பாகத் தொகுத்து வழங்கி  நெறிப்படுத்திய துளசி இளங்கோவன் கவிஞரது மகள் என்பது நிகழ்ச்சியின் பாதியில் தான் எனக்குத் தெரியும். வியப்பளிக்கும் வகையில் நேர்த்தியாக நிகழ்ச்சியைக் கொண்டு சென்றார் துளசி.

கருவறைப்பூக்கள் நூலுக்கு அணிந்துரை எழுதியிருக்கும் திரு வைகோ அவர்கள்,

கவிதை என்பது பூக்களாக மட்டுமல்ல,
வாட்களாகவும்; தழுவும் தென்றலாக
மட்டுமல்ல, கிளர்ந்தெழும் புயலாகவும்
இருந்திட வேண்டும் என்பதை உணர்ந்தே
ஒவ்வொரு கவிதைகளையும்
வடித்திருக்கிறார் கவிஞர்.


கவிஞர் மலர்விழி இளங்கோவனின்
"கருவறைப் பூக்கள் காகிதப் பூக்களல்ல,
காவியப் பூக்கள்."

என்று முடித்திருக்கிறார்.

பேராசிரியர்  முனைவர் திரு.சுப.திண்ணப்பன், கவிமாமணி புதுமைத்தேனீ திரு. மா.அன்பழகன், சிங்கப்பூர் தமிழ் எழுத்தாளர் கழகத் தலைவர் திரு நா.ஆண்டியப்பன், கவிஞர் திரு.பிச்சினிக்காடு இளங்கோ ஆகியோரும் அணிந்துரை எழுதி சிறப்பு சேர்த்திருக்கிறார்கள்.

பின்பு நூல் பெற்றுக் கொள்ளும் நிகழ்வு தொடந்து நடந்து கொண்டிருந்தது.

இந்த நிகழ்வினூடாக தமிழ் இலக்கிய வட்டத்தின் உடன்பிறப்புகள் சிலரைச் சந்திக்கும் வாய்ப்பும் கிடைத்தது. முனைவர் இரெத்தின வெங்கடேசன், கவிஞர் பாலு மணிமாறன்,எழுத்தாளர் மாதங்கி, புலவர் பாண்டித்துரை, கவிஞர் நூருல் அமீன், பட்டிமன்ற பேச்சாளர்கள் பெரி.சிவக்குமார், ஸ்டாலின் போஸ், சிங்.செயக்குமார் மற்றும் நண்பர்கள்.

இறுதியாகச் சிற்றுண்டிக்குப் பிறகு விழா இனிதே நிறைவடைந்தது.

நூல் : கருவறைப் பூக்கள் (கவிதைத் தொகுப்பு)

ஆசிரியர் : மலர்விழி இளங்கோவன்

வெளியீடு : மது பதிப்பகம்

விலை : ரூ 80/ S$12

நூல் விமர்சனத்தை இன்னொரு பதிவில் பார்க்கலாம்.

அத்திவெட்டியில் ஓர் அழகிய பொங்கல்!

அத்திவெட்டியில் ஓர் அழகிய பொங்கல்!

போகியில் தீயன போகி
யோகமும் போகமும் பொங்க

இல்லம் புதுப்பிப்பு
இரவல் பொருள் திருப்பி ஒப்படைப்பு

வசதிக்காரர் வீட்டில்
வண்ண வண்ண சாயங்களும்
வகை வகையான பொருட்களும்

நடுத்தர குடும்பம்
நமக்கு வெள்ளை மட்டும் தான்
நகை போதும் புன்னகை

ஏழை மக்கள்
ஏங்கி மொழுகினார் சாணத்தால்
ஏற்றம் வரும் என நம்பி

மதுக்கூர் சந்தையிலே
மஞ்சள் கொத்து,
வாழைத்தார்கள்
வகைவகையாய்
செங்கரும்பு வாங்கி
செழிக்க வைப்போம் -நம்
செவ்வேர் விவசாயியை

வறுத்தெடுக்க வாளை மீனும்
வகை வகையாய் காய்கறியும்

வண்ண வண்ண கொம்புச்சாயம்
வசீகரிக்கும் நெத்திசுட்டி

சின்ன சின்ன இதழ் தொடுத்த
சிங்கார மாட்டு மாலை

தேடித் தேடி வாங்கி வந்து
தேக்கி வைத்த நன்றிதனை
தெவிட்டத் தெவிட்ட தந்திடுவோம்

அதிகாலை பொங்கலன்று விழித்து
வீட்டை சுத்தம் செய்து கழுவி
விதவிதமாய் கோலங்களால் தழுவி
மங்கையர்கள் மகிழ்ந்து மகிழ்ந்து உலவி
மற்றவர்கள் இல்லங்களில் போய்
மகிழ்ந்து மகிழ்ந்து
கோலங்களைப் பார்ப்பர்
கூடிப் பேசி குதூகளிப்பர்.

சரியான நேரத்தில்
சரமாக கோடு திறந்து
தளமேடை அமைத்து
சாணத்திலே அருகம்புல் பிள்ளையார்
கிழக்குப்பக்கம் பார்க்கவைத்து
வாழைப்பழ சீப்பும், செங்கரும்பும், மஞ்சள் கொத்தும்
வழமை போல் சர்க்கரைப்பொங்கல் வெற்றுப்பொங்கல்
பொங்கி வரும் நேரந்தனில்
பொங்கலோ பொங்கல்!
பொங்கலோ பொங்கல்!
பொங்கலே பொலிக!!
பொங்கலே பொலிக!! -என்று
கூவிக் கூவிக் குதூகளிப்போம்

பொங்கிய பொங்கலுக்கு
மஞ்சள் கொத்தால்
மாலையிட்டு
ஞாயிறு தொழுது குடும்பத்தோடு
நன்றிக்கடன் தீர்த்துவைப்போம்.

ஆண்டிற்கு ஒருமுறை
அறுதியிட்டு கூறாவிட்டால்
அதனையும் மறந்து விடுவோமோ?

மறுநாள் மாட்டுப்பொங்கல்
மகிழ்வுடனே எதிர்பார்த்து
வருடமெலாம் திங்கும் வைக்கோலுக்கு
வசதியாய் விடைகொடுக்க
வந்தது பொங்கலென்று
வாரி வாரி அறுத்திடுவோம்
வயல்களிலே வளர்ந்த புல்லை

காலையிலிருந்து கால்நடைகளிடம்
கனிவுடனே நடந்துகொள்வோம்
களத்துமேட்டிலே நற்ப் புல்
கண்ட இடம் மேய்த்து
கானோடை ஓடை செவந்தான்,
சாமந்தி பிச்சினி ஒடப்பா
திரிகுளம் வீரையன்குளம் வண்ணார்குளம்
தண்ணீர் காட்டி குளிப்பாட்டி
வீட்டுக்கு ஓட்டிவரும் முன்னே
செங்கல் மாவில் கோலமிட்டு
மங்கையர்கள்
மகிழ்வுடனே காத்திருப்பார் வரவேற்க
குங்குமமும் இட்டிடுவார்
கோலமிடும் பொற்ச்செல்வி
சங்கதனைக் கட்டிடுவார்
சரஞ்சரமாய் வண்ண மாலையும் இட்டு
செதுக்கப்பட்ட கூரிய
கொம்புக்கு வண்ணம் தீட்டி

பெரியவன் வைரவன் வனத்தில் பெற்ற
ஈச்சை மட்டை கசங்கை
மெல்லிய சுத்தியால் இழைத்து
மாவிலை வேப்பிலை பெரண்டை
ஆவாரம்பூ கன்னிப்பூ நெல்லிக்கொத்து
மாலையாய் தொடுத்து ஒற்றைப்படையில்
மகிழ்வுடனே மாட்டுக்கு மாலையிட்டு

பொங்கிய பொங்கலை ஊட்ட
தண்ணீர் நல்லெண்ணெய் அரப்பிட்டு
தண்ணீரிட்டு கழுவி
பொங்கலூட்டி வாய் கழுவி
தாரை தப்பட்டையோடு
பொங்கலோ பொங்கல்!
பொங்கலோ பொங்கல்!!
பொங்கலே பொலிக!
பொங்கலே பொலிக!! -என்று
போற்றிடுவோம் மாடுகளை என்றும்...

திட்டியதை சுற்றியும் போட்டு
மாட்டை தாண்டவிட்டு
கட்டிடுவோம் புது அச்சில்
கொட்டிடுவோம் புல்லதனை
தெவிட்டத் தெவிட்ட

பசியறியா விரதம் இன்று
விருந்தினரை உபசரித்து -பின்
பசியாறி விருந்தோம்பல் போற்றிடுவோம்

கண்ணுப் பொங்கலை
காணும்பொங்கலாய்
கன்னிப் பொங்கலாய்
கவின்மிகு கலைநிகழ்ச்சிகளும்
களித்திடுவோம் பிள்ளைகள் விளையாடக் கண்டு
காத்திடுவோம் தமிழர் பண்பாடு என்றும்...


அன்புடன் ஜோதிபாரதி


நன்றி
வார்ப்பு
பதிவுகள்
திண்ணை
கீற்று

விவசாயிகளுக்கு ஏன் அரசு உதவி செய்ய வேண்டும்? பொது புத்தியும், ஆதங்கமும்

ஆடிப்பெருக்கல்ல ஆனந்தப்பட - வெள்ளப்பெருக்கு



இரவெல்லாம் மழை -ஆம்

இடியும் கூட


இரக்கம் இல்லை இந்த வானுக்கு

உறக்கமில்லை எனக்கு


அன்று நட்ட நடவு மஞ்சநேரி வயலில்

விடியும் வரை காத்திருந்தேன்


காலை இரவை தழுவிக்கொள்ளும் வேளையில்

வெளிக்கிட்டேன் வயலுக்கு மண்வெட்டியுடன்


இளங்காடு கடந்து அறை மணி நேரத்திற்குள்

அடைந்தேன் மஞ்சநேரி எல்லையை


எட்டிப்பார்த்தால் எங்கும் வெள்ளக்காடு

சொல்லி மாளாது என் வேதனையை துயரை


தூரத்து வாய்க்காலில் ஆங்காங்கே நட்ட நாற்று

மிதந்து வரக்கண்டேன்


வந்த கண்ணீரை துடைத்துக்கொண்டேன்

நீயுமா இந்த வெள்ளத்தில் கலக்கவேண்டும் என்று


வயலை நெருங்கினேன் வாய்க்கால் காணேன்

நட்ட நடவு காணேன் வரப்பு காணேன் -அட

நில அளவைக் கல்லையே காணேன்

நிலைகுலைந்து போனேன்


இறங்கினால் இடுப்பளவு நீர்

உணர்ந்துகொண்டேன் ஒரு சாண் பயிரின் நிலையை


பயிரே தெரியவில்லை

வயிறு மட்டும் எரிந்தது

தண்ணீருக்குள்ளேயும்


வாடிய பயிரை கண்டு வாடியவர் வள்ளலார்

இங்கே மூழ்கிய பயிரை கண்டும் வாடினேன்


வரப்புயர நீர் உயரும், நீர் உயர நெல் உயரும்

இங்கே வரப்பும் பயிரும் தெரியவேயில்லை

நீர் மட்டுமே உயர்ந்து நின்றது


வெள்ளத்தனைய மலர் நீட்டம் மட்டும் தானா?

இங்கே பயிர் நீட்டம் கூடாதா?


தண்ணீரை வரவுக்கு மேல் செலவு செய்ய

முடியாமல் வருந்தினேன்


வடிகால் வெட்டலாம் என்றால்

அதுவும் மிதந்து போகிறது


திரும்பிப் பார்த்தேன்

ஏரிக்கு போய் மதகடைப்போம் என்று


மதகடைப்பதென்றால் பலகை இறக்குவதொடு

சில திரை வைக்கோலும்

தேவைப்படும் என்று தெரியும்

இருந்தாலும் சென்றேன் மஞ்சநேரியை நோக்கி


போகும் வழியில் தண்ணீரின் வேகத்தை கண்டேன்

இருந்தாலும் சென்றேன் மனம் தளராமல்


ஏரியை நெருங்கியதும் நொறுங்கினேன்

கரை உடைத்து நீர் புரண்டோடுவதை கண்டு


தனக்கியன்றதையும் இயலாததையும் செய்ய முடியா

சொல்லொணாத் துயருற்றேன்


வீட்டுக்கு பயணித்தேன் -வழியில்

வந்த யாரையும் பார்க்கவில்லை

யாரும் வயலைப்பற்றி கேட்டால்

பதிலுரைக்க வெட்க்கப்பட்டு


மஞ்சநேரி வயல் எப்படி இருக்கிறது?

அம்மா கேள்விக்கு அயர்ந்து போய்

அமர்ந்தேன் சொல்லற்றவனாய்

பதிலுரைத்தேன் கண்ணீர் துளிகளாக


அடுத்தவருடம் பார்த்துக்கொள்ளலாம் என்ற

அம்மாவின் தேற்றுதல் வரிகளுடன்

ஆறுதல் அடைந்தேன்


என் உள்மனசு சொன்னது

எத்தனை முறைதான்

இந்த வரிகளை கேட்டு ஆறுதல் அடைவது என்று…




அன்புடன் ஜோதிபாரதி

சிஃபி தமிழ் 2008 பொங்கல் சிறப்பு மலரில் பிரசுரமாகியுள்ளது
பதிவுகள்

வார்ப்பு கவிதை இதழ்
திண்ணை
கீற்று

வள்ளுவர் சிலைக்கும் பூமி பூஜை(சை)யா??? அடப்பாவத்தே...!

டெல்லி தமிழ்ச் சங்க வளாகத்துக்கு திருவள்ளுவர் சிலை இடம் மாற்றம் செய்யப்படுவதையொட்டி அதற்கான அடிக்கல் நாட்டு விழாவும், பூமி பூஜையும் நேற்று (16ம் தேதி) நடந்தது.டெல்லி ராமகிருஷ்ணாபுரத்தில் கடந்த 20 ஆண்டுகளுக்கு முன் திருவள்ளுவர் சிலை நிறுவப்பட்டது. ஆனால் இந்த சிலை எந்தவித பராமரிப்பும் இன்றி சிதிலமடைந்து வந்தது.இதையடுத்து சிலையை டெல்லி தமிழ்ச் சங்க வளாகத்துக்கு மாற்றும் முயற்சியில் அதன் நிர்வாகிகள் இறங்கினர்.

தமிழக அரசியல் தலைவர்களின் உதவியோடு இந்த முயற்சி எடுக்கப்பட்டது. இதையடுத்து சிலையை தமிழ்ச் சங்க வளாகத்துக்கு இடம் மாற்ற டெல்லி முதல்வர் ஷீலா தீக்ஷித் சமீபத்தில் அனுமதிளித்தார்.இதையடுத்து நேற்று தமிழ்ச் சங்க வளாகத்தில் திருவள்ளுவர் சிலை வைக்க தேர்வு செய்யப்பட்டுள்ள இடத்தில் இதற்கான அடிக்கல் நாடு விழாவும், பூமி பூஜையும் நடந்தது.சோமாஸ்கந்த சாஸ்திரி இந்த பூமி பூஜையை நடத்தினார். இந்த நிகழ்ச்சியில் டெல்லி தமிழ்ச் சங்க தலைவர் கிருஷ்ணமணி, துணைத் தலைவர் சேதுதுரை, பொதுச் செயலாளர் இரா.முகுந்தன், பொருளாளர் சந்தானம், இணைச் செயலாளர்கள் ராகவன் நாயுடு, ரமாமணி சுந்தர், முன்னாள் தலைவர்கள் பாலச்சந்திரன், ராமாமிர்தம், முன்னாள் செயலாளர் கிருஷ்ணமூர்த்தி, வடக்கு வாசல் ஆசிரியர் கி.பென்னேஸ்வரன் மற்றும் பலர் விழாவில் கலந்து கொண்டனர்.

திருவள்ளுவர் சிலையை தமிழ்ச் சங்க வளாகத்துக்கு இடம் மாற்றியதும், பிரதமர் மன்மோகன்சிங், காங்கிரஸ் தலைவர் சோனியா காந்தி, தமிழக முதல்வர் கருணாநிதி, டெல்லி முதல்வர் ஷீலா தீக்ஷித் ஆகியோரை அழைத்து திறப்பு விழாவை மிக விமரிசையாக நடத்த தமிழ்ச் சங்கம் முடிவு செய்துள்ளது.

எல்லாம் முரண்பாடாக இருக்கிறதே...!

கலைஞர் நாத்திகர் அவர் திறக்க இருக்கும் வள்ளுவர் சிலைக்கு பூமி பூஜையா?
ஆச்சர்யாமாதான் இருக்கு...!
எனது கண்டனங்கள்!!

கட்டிடத்துக்குள்(தமிழ்ச் சங்கம் மாதிரி) திருவள்ளுவர் சிலை வைத்தால் நல்லது என்று நினைக்கிறேன். தமிழகம் முழுதும் சாலைகளை எல்லாம் சிலைகளால் நிரப்பி(1008 கொடி கம்பங்கள் வேறு), போக்குவரத்துக்கு பெரிய இடைஞ்சலை ஏற்படுத்துகிறார்கள்.

சிலைகள் சில குரங்குகளாலும் காகங்களாலும் சேதத்துக்குள்ளாகின்றன. சிலைகளைப் பார்க்கும் போதே அந்த தலைவரை நினைத்து வேதனைப் பட வேண்டிஇருக்கிறது.

தெருவுக்கு தெரு, சாலைக்குச் சாலை சிலை எழுப்புவதற்கு பதிலாக கன்னியாகுமரி திருவள்ளுவர் சிலை போல அதற்கு இடம் ஒதுக்கி நினைவுச்சின்னங்களை எழுப்பலாம்.

இனியாவது சிந்திப்பார்களா?

அன்புடன்,
ஜோதிபாரதி.

எழவு வீட்டில் எழுந்த இலட்சியம்

எழவு வீட்டில்

விடிய விடியச்

சீட்டாடும் இலட்சியவாதிக்கு

ஒரு கையில் ராஜா இருந்தார்

சிகரெட்டுடன்.


ராணியைத் தேடி

அலைந்த கைக்கு

தேநீர் கொண்டுவந்து

கொடுத்தது

ஒரு சின்ன ராணி.

புகை போக்கிக் கொண்டிருந்த

சிகரெட் வெட்கிச் சிவந்து

தலைகுனிந்தது.


இலட்சியத்தை அடைய

சீட்டுக்கட்டு

ராஜாவை வைத்துக்கொண்டு

போராடிக்கொண்டிருந்தார்

இந்த ஜோக்கர்.




அத்திவெட்டி ஜோதிபாரதி

சாதி மத வெறியர்களுக்கு இங்கே சுளுக்கு எடுக்கப்படும்

ஆயிரத்தில் ஒருவன்

எல்லா சாதி மதத்தினரின்

மானத்தையும்

கரும்புள்ளி செம்புள்ளி குத்தி

கழுதைமேல் ஏற்றி

கஞ்சி குடிக்கவைத்து

துவைத்து

சுளுக்கெடுத்து

அழுக்கெடுத்து

காயவைத்து

சூடும் வைத்து

கை கால்களை

மடித்துக் கட்டிப்போட்ட

சலவைத் தொழிலாளி



அன்புடன் ஜோதிபாரதி.

கருகி விழுந்த சருகு

மல்லிகை மொட்டுகளும்

முதிர் கன்னிகளாய் மலர்களும்

பறிக்கப்பட்டு

மாலைகள் தொடுக்கும் வரை

அண்ணனாய்க்

காத்திருந்த கனகாம்பரம்

கதம்பத்தில் சேர்த்துக்

கட்டமுடியாமல்

காய்ந்து

கருகி விழுந்தது

சருகாய்


அன்புடன் ஜோதிபாரதி

பூங்காவினுள் ஒரு பனை விருட்சம்

அந்தரான கிராமத்தில்

ஒத்தைப் பனைமரம்

நுங்கு நுகர்வாரில்லை

காத்திருந்த பனம்பழம்

வழிப்போக்கனின் வண்டியில்

விழுந்தது

காகம் அமர்ந்த கணத்தில்

பழம் சப்பி ருசித்த

வண்டியோட்டி

கொட்டையை மட்டும்

வீசி எறிந்தான்

பூங்கா என்று தெரியாமல்

மரமாக வளர்ந்து நின்றது

ஒரு பனை விருட்சம்

பூங்காவினுள்

வெளிநாட்டுக்காரர்களும் வந்து நின்று

படமெடுத்துக்கொண்டார்கள்



அன்புடன் ஜோதிபாரதி

கவிதா இனிக்கும் கவிதா!

கவிதா இனிக்கும் கவிதா!

கற்பனை இல கவி பாட

கவிபட பொருள் பாட

கவிதா இனிக்கும் கவிதா!

கரு களையாமல் -கவின்மிகு

நடையழகை நவில -நல்

சொற்குதிர் திறந்து செய்யுள்

கவிதா இனிக்கும் கவிதா!



அன்புடன் ஜோதிபாரதி

சிறைப்பறவை

சிறகிருந்தும்

சிறைப்பறவை

கூண்டுக்கிளி




அன்புடன் ஜோதிபாரதி

ஏழைத் தாயின் ஏக்கம்

ஏழை விவசாயி நான்
இருக்கும் இடமும்
இறுகிய இல்லமும்
ஒரு சாண் வயிற்றுக்கு
ஓர் ஏக்கர் நிலமும் சொந்தம்

சாண் பிள்ளையானாலும்
ஆண் பிள்ளை என இரண்டு

அழகான பிள்ளைகள் -என
அனைவருமே கண் வைத்தார்

நாடறிந்த பிள்ளைகளாய்
நல்ல பேர் எடுக்க வேணுமென்று

ஊருக்கு அஞ்சி
ஊட்டி ஊட்டி நான் வளர்த்தேன்.

சங்கடங்கள் தெரியாம
சகிச்சுக் கொண்டு நான் வளர்த்தேன்

பள்ளிக் கூடம் போகவேண்டி
படிச்சு படிச்சு நான் சொன்னேன்

சொன்னபடி செய்தார்கள்
சுற்று வட்டாரத்தில்
நல்லவர்கள் மகிழ்ந்தார்கள்

சொத்து பத்து வித்து
சுகங்களையும் விட்டு
மேல்படிப்பு
படிக்கவைக்க
பட்டணத்துக்கனுப்பிவைத்தேன்

வயிற்றுக்குப் பாதகம் பண்ணாமல்
வயிறாரச் சாப்பிடு -என
வாரி வாரி பணம் கொடுத்தேன்

பட்டினி பசியும்
பரிதவிக்கும் வாழ்க்கையும்

பழைய சோறு பருக்கையையும்
வெங்காயம் புளித்துவையல்
பட்சனமாச் சாப்பிட்டேனே

விடுமுறைக்கு வரும் போது
விருந்து வைத்து நான் மகிழ்ந்தேன்

இன்னும் சப்பிடென்று
இட்டுக்கொண்டே நான் இருந்தேன்

படித்த மகனே -உன்னைப்
பார் புகழ வேண்டும் என்று
பரிகாரம் செய்துவந்தேன்

நொடித்துப் போனாலும் பரவாயில்லை-நீ என்னை
நோகடிக்க மாட்டாய் என்று
தடித்த நம்பிக்கையுடன்
தாகம் வந்து காத்திருக்கேன்…



அன்புடன் ஜோதிபாரதி

பலிபீடம் பாருக்குள்ளே நல்ல நாடாகும்

விடிவெள்ளி தெரிகிறது
வந்து பார்

உன் நிலத்தின் பொழியை
நீயே அளந்து கொள்வாய்

நீ உழுது நட்ட பயிர்
கதிரானதும்
நீயே அறுத்து
உன் குதிரில் இடுவாய்

நீ சேர்த்த சொத்து
உன்னோடு இருக்கும்

சொல்லிக்கொள்ளாமல்
அள்ளிக்கொண்டு ஓடும்
நிலை மாறும்

உன் இடத்தில் நீ உலவ
உதவாக்கரை ஒப்புதல்
தேவையில்லை

வேடர்கள் வீழ்ந்து போவர்
வெள்ளி நிலா உலவும்
விண்மீன்கள் சாமரம் வீசும்
வேங்கைகள் நாடாளும்
வீர மறக் கொடி பறக்கும்

தமிழ் வெள்ளம் அருவியாகும்
பாலாறாய்ப் பெருக்கெடுக்கும்

மல்லிகை
மண மணக்கும்
மாஞ்சோலைக்
குயில்கள் கூவும்

வண்ணமயில்
தோகை விரித்தாடும்

உன் பூமியில்
காகம் மட்டுமே கரையும்

ஓலங்கள் ஒழிந்து
ஏலங்கள் குவியும்

துயரங்கள் துடைத்து
துலாபாரம் பெருகும்

கள்ளிச் செடிகளும்
கவி பாடும்

பூங்கொத்துகள்
புன்னகை
பரிமாறிக் கொள்ளும்

தென்றல் மட்டும்
உன்னைத் தீண்டும்

வானவில் உனக்குத்
தோரணம் கட்டும்

மேகங்கள்
பன்னீர் தெளிக்கும்

முல்லைப் பூக்களுக்கும்
முடிசூட்டப்படும்


நீ நாடிய நாடெல்லாம்
உன் நாட்டை நாடும்

பூவரசு
பொன்னரசாகும்

வையம் போற்றும்
வல்லரசாகும்

எள்ளி நகைத்தவர்
ஏமாந்து போவர்

விதைக்காமல்
முளைக் கொட்டும்

பலிபீடம்
பாருக்குள்ளே நல்ல நாடாகும்




அன்புடன் ஜோதிபாரதி

சென்னை வாசத்தால் கடன் கழியவில்லை

காலை எழுந்தவுடன்
கடுங்குளிர்

அக்கம் பக்கத்திலே
அளவு கடந்த கூட்டம்

கூட்டுரிமைப் பொதுக் கழிப்பறை
நிரம்பி வழிந்தது
நீரில்லாமல்
மக்களால்

மாநகரக் கழிப்பறைக்குச் சென்றால்
மக்கள் வரிசை பிடித்து நிற்கிறார்கள்

காசு கொடுத்தால் இங்கு கொஞ்சம்
கழுவத் தண்ணீர் கிடைக்கும்
வரிசை கழிய வேண்டுமே முதலில்

வரிசை கழிந்து
வந்து பார்த்தால்

கற்பனைக்கு அப்பாற்ப்பட்ட கழிவறை
கதவு மட்டும் தான் இல்லை

தண்ணீர் கிடைக்கும்
ஊற்றும் போது மட்டும்

நேரத்தைக் கழிக்கக் கூடாது
சீக்கிரம் வாங்க என்கிற சத்தம்
காதைப் பிளக்கும்
நாசி வேறு பிளக்கப்படுகிறது

மொத்தத்தில்
காசு மட்டும் கழிந்தது
கடன் கழியவில்லை



அன்புடன் ஜோதிபாரதி

என்றும் சுஜாதா

திருவரங்கக் காவிரி

கொள்ளிடம் சென்று

கடலில் கலந்து விட்டது

அதன் பிரதான நதியும்

கிளை நதிகளும்

என்றும் நம்முடன்...


2000-ம் ஆண்டு சிங்கப்பூரில் நடைபெற்ற உலகத் தமிழ் இணைய மாநாட்டிற்கு சன் டெக் சிட்டி செற்றிருந்த போது, புத்தக மற்றும் மென்பொருள் கடைகளை ஒவ்வொன்றாக பார்த்துக்கொண்டு வந்தேன். திடீரென்று யாரோ ஒரு பெண்மணியின் குரல் தம்பி! என்று அழைத்தது கேட்டது. சட்டெனத் திருப்பிப் பார்த்தேன். அந்த பெண்மணிக்கு பக்கத்தில் எழுத்தாளர் சுஜாதா நின்று கொண்டு இருந்தார். ஆச்சர்யத்துடன் அவர்கள் இருவருக்கும் புன்முறுவலுடன் வணக்கம் தெரிவித்துவிட்டு, அவர்களிடம் சென்றேன். நான் திரு சுஜாதாவோடு பேசுவதற்குள் அந்த பெண்மணி இவர்தான் எழுத்தாளர் சுஜாதா என்று எனக்கு அறிமுகப் படுத்திவிட்டார். இவ்வளவு உயர்ந்த, பிரபலமான எழுத்தாளரை நமக்கு அறிமுகப்படுத்தி வைக்கிறாரே என்று கொஞ்சம் சங்கடத்தில் நெளிந்தது உண்மை. நான் சொன்ன பெண்மணி திரு சுஜாதா அவர்களின் துணைவியார் என்று பின்பு தெரிந்து கொண்டேன். பிறகு சுஜாதா அவர்களிடம் இணையத்தைப் பற்றி அவர் எழுதிய ஒரு புத்தகம் பெற்று வந்தேன்.அந்த அமைதியான, அபூர்வமான மனிதரை இன்று நாம் இழந்துவிட்டோம். அவரை இழந்தாலும், அவருடைய எழுத்துக்கள் என்றும் வாழும் நம்முடன்...



அன்புடன் ஜோதிபாரதி

எண்ணெய்க் குளியலுக்காக ஏக்கத்துடன் காத்திருந்தேன்

ரொட்டிப் பரோட்டா கேட்டேன்

எண்ணெயில் முக்கி மூழ்கடித்துப்

பொரித்துக்கொடுத்தாய் -நீ

அவசரமாய்க் கொடுத்ததை

அவசரமில்லாமல் காத்திருந்து

வாங்கிச் சென்றேன்

ஒன்றை மட்டும் கொடுக்க

மறந்து விட்டாய்

குழம்புக்குப் பதிலாக

அரப்பைக் கொடுத்திருந்தால்

அழகாகக் குளிப்பாட்டி இருப்பேன்

எண்ணெய் என்ன செய்யும் என்று

நீ உரைக்காமல் புரிந்திருப்பேன்.



அன்புடன் ஜோதிபாரதி

அழகின் அழகு அமிழ்கிறது காணீர்!

அழகின் அழகு அமிழ்கிறது காணீர்!

இறக்கையில் முதுகில்
இளம் பச்சை

மார்பிலோ
மாம்பழ நிறம்

கண்ணுக்கு மையிட்ட
கச்சிதமான அழகு

வானின் நீல நிறம்
வாலுக்கு வைத்துக் கொண்டாய்

வாலுக்குக் கீழே
வசீகரிக்கும்
வண்ணக் குங்குமப் பொட்டோ?

வெடுக்கென்ற பார்வை
விஞ்சுகின்ற அழகு

அழகான கால்கள்
அசைந்து வரும் ஒன்றாய்

தவ்வித் தவ்வி அழகாய்
தவழ்ந்து வரும் அழகு

தவிக்கவிடும் நம்மை
தமிழச்சியோ என்று

அழகானப் பாதை -நீ
விரும்புகிற பாதை

ஆயுத பூசை அன்று
ஆயிரம் பேர் வருவீர்கள் என

அங்கலாய்த்து நாமிருந்தோம்

முன்பே வந்திடுவாய் -உன்
முக அழகைக் காட்டிடுவாய்

சீட்டடித்து நாம் பாட
சிங்கார நடைதனையே
சிறப்பாக நடந்திடுவாய்

அழகாக வாலாட்டி
அருமையாக ரசித்திடுவாய் -நீ

அப்பாவி என்றுணர்ந்து
அடைந்திடுவார் உன்னை

அவர் அழகானக் கொண்டையைப் பிடித்துக்கொண்டு
ஆடச்சொல்வார் பொய்யாக

“இருந்த இடத்தில் கொண்டுபோய் விடுறேன்
கூத்தாடு கூத்தாடு” என்று

அழகாய் ஆடி ஆடி
அனைவரையும் மகிழ்விப்பாய்

இயல்பாய் செய்கிறாய் என்று
இறக்கையையும் பிடுங்கிடுவார்

அழகை அமிழ்த்திடுவார்
அருமை தெரியாதார்

காச்சுள் என்கிற உன்பேரை
தவறாகப் புரிந்து கொண்டு

காச்சு என்று உரைத்தனரோ
கவலையிலே வாடுகிறோம்

அன்புடன் ஜோதிபாரதி

கிராமங்களைச் சீரழிக்கும் திமிங்கிலங்களும், திரைகடலோடிகளும்

கிராமங்களைச் சீரழிக்கும் திமிங்கிலங்களும்,திரைகடலோடிகளும்

கிராமங்களில் உள்ள கோவில்களில் ஆண்டுக்கு ஒருமுறை திருவிழாக்கள் களை கட்டும். கிராம மக்களுக்கு இந்த தருணம் மகிழ்ச்சியான தருணமும் கூட. உறவினர், நண்பர்களை திருவிழாக்களுக்கு அழைத்துவந்து உபசரிப்பது. புத்தாடை அணிந்து மகிழ்வது. இன்னும் பட்டியல் நீளும்.

திருவிழாக்கள் ஒரு மாதம், 15 நாட்கள், ஒருவாரம், ஒரு நாள் இப்படி வசதிக்கு தகுந்தபடி கொண்டாடுவார்கள். இந்த கொண்டாட்டங்களில், திரைப்படங்கள் திரையிடுதல், கரகாட்டம், நடன நிகழ்ச்சிகள், சமுக நாடகங்கள் மற்றும் புராண நாடகங்கள் வள்ளித் திருமணம், அரிச்சந்திர மயானகாண்டம், சத்தியவான் சாவித்திரி, பவளக்கொடி போன்றவைகளும் வசதிக்கேற்ப சிறப்பாக நடைபெறுவது வழக்கம்.

சமீப காலமாக இந்த நிலை கொஞ்சம் கொஞ்சமாக மாறி, கலை இரவு என்று ஒரு நிகழ்ச்சி நடைபெறுவதாக நண்பர் திரு.சரவணன் தெரிவித்தார். இந்த நிகழ்ச்சியைப் பற்றி அவர் விவரித்த விதம் என்னை மிகுந்த வேதனைக்குள்ளாக்கியது. சினிமாவில் நாம் பார்த்து ஆபாசம் என்று சொல்கிறோம் அல்லவா? அதையும் தாண்டி அருவெறுக்கத்தக்க விரசமான ஒரு நிழ்வாக இருப்பதாகவே திரு சரவணன் மேலும் கூறுகிறார். இதை கோவில் போன்ற புனிதமான இடங்களாகக் கருதப்படும் இடங்களில் நிகழ்த்துவது ஏனோ? அதையும் தாண்டி கிராமத்துக் கோவில்களில் இந்த நிகழ்ச்சியின் போது இளம் சிறார்கள், குழந்தைகள் கொட்ட கொட்ட விழித்திருந்து பார்ப்பதாகவும் தெரிவித்தார். இது மேலும் நமது வேதனையைக் கூட்டியது. இந்த பிஞ்சு உள்ளங்களில் நஞ்சை விதைக்கும் வானரங்களும் உட்கார்ந்து பார்ப்பதாகவும் கேள்விப்பட்டேன். அவர்களை அறுபதைத் தாண்டிய திமிங்கிலங்களாக, வாளை மீனு, விலாங்கு மீனாக சித்திரம் பேசுதடி திரைப்படத்தில் உருவகப்படுத்தியுள்ளார்கள். குழந்தைகளாக இருக்கும் போது நடக்கும் விடயங்கள் அவர்கள் வாழ்நாள் இறுதி வரை பாதிப்பை ஏற்ப்படுத்தும் என்பது ஏன் இந்த திமிங்கிலங்களுக்குத் தெரியவில்லை?

இன்னொரு விடயம், இந்த நிகழ்ச்சிக்கு ஆகும் செலவு சுமார் ஐம்பது முதல் அறுபதாயிரம் என்றும் கேள்விப்பட்டேன். நண்பர் திரு சரவணன் கூற்றுப்படி, இந்த நிகழ்ச்சிக்கு ஆதரவு மற்றும் பண உதவியை அந்த கிராமத்தைச் சேர்ந்த "மலேசிய,சிங்கை வாழ் ஊழியர்கள்" செய்திருக்கிறார்கள். இது அதை விடக் கொடுமை. நீங்கள் கடின உழைப்பால் சம்பாதிக்கும் பணத்தை உங்கள் குடும்பத்துக்கு, அம்மாவிற்கு, அப்பாவிற்கு, மனைவிக்கு அனுப்புங்கள். ஏன் இப்படி உங்கள் பணத்தை வீணடிக்கிறீர்கள். வீணடிப்பதோடு மட்டும் அல்லாமல் பிஞ்சுக் குழந்தைகளையும், அப்பாவி கிராம மக்களையும் கெடுத்து, எடுத்து வைத்து மூடாதீர்கள். அப்படியே நீங்கள் எதாவது ஊருக்கு செய்ய வேண்டும் என்று நினைத்தால் நன்றாகப் படிக்கும் பள்ளி மாணவர்களுக்கு பரிசு வழங்கி ஊக்கப் படுத்துங்கள், விளையாட்டு விழாவிற்கு பண உதவி செய்து உங்களை கௌரவப் படுத்திக் கொள்ளுங்கள். பள்ளிக் கட்டிடம் சரியில்லை என்றால் புதிதாகக் கட்டிடம் கட்டி கொடுங்கள். நூலகம் கூட கட்டிக் கொடுக்கலாம். குளத்தைத் தூர் வார உதவி செய்யலாம்.

இதைப் படிக்கும் நல்லெண்ண சமூக ஆர்வலர்கள், தங்களுக்கு தெரிந்தவர்கள் யாரேனும் தங்களை அறியாமல் இந்த செயலில் ஈடுபட்டிருந்தார்கள் என்றால், இதன் தீமைகளை நாசூக்காக எடுத்துக் கூறி இது போன்ற நிகழ்ச்சிகளைத் தடுத்து நிறுத்த வேண்டுமாய் அன்புடன் கேட்டுக் கொள்கிறேன்.



அன்புடன் ஜோதிபாரதி

ஆயுதம் செய்வோம்

ஆயுதம் செய்வோம்

நிராயுதபாணியாய் நிற்கிறேன்
நிலை தடுமாறிப் போகிறேன்

ஊக்கம் கொடுக்க
ஒரு குருவி இல்லை
ஒப்பாரி வைக்கிறேன்

ஆக்கம் செய்வதற்கு
அஞ்சு காசு இல்லை
அவதிப் படுகிறேன்

ஏக்கம் ஒன்றே
கொண்டுள்ளதால் -யாரும்
ஏறெடுத்துப் பார்க்கவில்லை

நோக்கம் இல்லாமல்
நொந்து தவித்ததனால்
தூக்கமும் இழந்து
தவிக்கிறேன்

கோபம் கொப்பளிக்க
குறுக்கு வழியில் போனதால்
குட்டிச் சுவாராகிப்
போனதே மிச்சம்

அன்பே அறியவில்லை
அரவணைப்பு தெரியவில்லை

அன்பென்பது அமுதசுரபி -நான்
அதை அறியாத் தனிப்பிறவி

நிலை தடுமாறிவிட்டேன்
நிராயுதபாணியாக நிற்கிறேன்
அன்பு மட்டுமே ஆயுதமாய் -ஆம்
ஆயுதம் செய்வோம்



அன்புடன் ஜோதிபாரதி

எனதருமை வள்ளி

எனதருமை வள்ளி

காலை எழுந்தவுடன்

கணிவுடனே வந்திடுவாள்

சோலையிலிருந்து

சொக்கவைக்க வந்திடுவாள்

நாளையும் அவள் வேண்டும் -என்று

நச்சரித்துக் கொண்டிருப்பேன்

அம்மாவிடம் சொல்லி

அனுசரித்துப் போகச்சொன்னேன்

அவளின் குரல் கேட்டு

அவசரமாய் ஓடிடுவேன்

ஆசை ஆசையாய் -அவளை

அள்ளி அணைத்துக் கொள்வேன்

வெளுத்த நிறத்தாள்

வழவழக்கும் தோலாள்

வசீகரிப்பாள் என்னை

சுவைக்க நினைத்திடுவேன்

சும்மா இருக்க மாட்டேன்

பக்கத்து ஊரிலிருந்து வரும்

பதுமையல்லவா அவள்

சொர்க்கத்தாள் என்று

சொல்லிச் சொல்லி

சுவைத்திடுவேன்

அவள் எனக்குத் தந்தது

உரம் அள்ளி

என்னை அள்ளிக் கொண்ட

அவளோ மரவள்ளி



அன்புடன் ஜோதிபாரதி