கடைக்கோடியில் ஈழக்கனல்

ஈழத்தில் ஓர் இனம்
விச குண்டுகளால்
வித்தாகிறது

மறம் உரமாகிக்
கொண்டிருக்கிறது

உறவுப் பாலமின்றி
ஊண் உறக்கமின்றி
ஊடுருவித் தாக்கும்
குண்டுகளால்
உடைந்த தேகத்தை
ஊதிக் கொள்கிறார்கள்
அதுதானே மருந்து?!

இரத்தப் போக்கிற்கு
என்ன செய்வார்கள்?!

மரித்த குழந்தைகள்
மாளாத் துயரைக்
கொடுக்கின்றன
இவர்கள் வேறு
வயிற்றில் மண்ணள்ளிப்
போடுகிறார்கள்

துக்கத்தில் இருக்கும்
மக்களை
துயரத்தில் ஆழ்த்தும்
இந்திய அரச வாதம்
இலங்கைக்கு
ஆயுதம் அனுப்பி விட்டு
அப் பிராணி வேடம்
பூண்டு
அருவியாய் கண்ணீருடன்
பாவம்

தேர்தல் வந்து விட்டதால்
மக்களைத் தேடிவந்து
தேம்பித் தேம்பி அழுகிறது
ஓட்டுக்காக!

காலணியே அணிந்திராத
கடைக்கோடி தமிழன்
நாலடியில் போய் நிற்கிறான்
செருப்புக் கடையில்
வரிசைபிடித்து...!