ஈழத்தமிழர்கள் - அத்வானியைப் போல் கருத்து கொண்ட அகில இந்தியத் தலைவர் வேறு யார்?

தமிழகத்தில் நேற்று தேர்தல் பிரச்சாரத்தைத் தொடங்கிய திரு அத்வானி, ஈழத்தமிழர்கள் படும் துயரம், இழப்பு எல்லாம் தாய்த்தமிழகத்து மக்களை எந்த அளவுக்கு பாதிக்கும் என்பதை தான் உணர்ந்திருப்பதாகத் தெரிவித்திருக்கிறார். அண்மையில் புதுதில்லியில் வைகோ நடத்திய உண்ணா நோன்பில் கலந்து கொண்டு உரை நிகழ்த்தியிருக்கிறார் என்பது குறிப்பிடத்தக்கது.

அத்வானி தெரிவித்த கருத்துகள்!

இலங்கையிலும், மலேசியாவிலும் வாழும் தமிழர்களுக்காக கவலைப்படும் தமிழ் மக்களை பாராட்டுகிறேன். இலங்கை தமிழர்கள் நலன் காக்கப்பட வேண்டும் என்று மத்திய அரசு சிந்தித்து கூட பார்க்கவில்லை. தமிழகத்தில் உள்ள மக்கள் தங்களது சகோதரர்கள் படும் துன்பத்தை பார்த்து படும் கவலைகளை என்னால் உணரமுடிகிறது.

தமிழகத்தில் இருந்து ஆயிரக்கணக்கான தமிழ் மக்கள் டில்லியில் வந்து போராட்டம் நடத்தினர். மத்திய அரசு உணர்வே இல்லாமல் செயலாற்றி வருவதாக அப்போதே நான் குற்றம் சாட்டினேன்.

கடந்த 5 ஆண்டுகால காங்கிரஸ் ஆட்சியின் செயல்பாட்டையும், அதற்கு முன் 6 ஆண்டுகால வாஜ்பாய் அரசின் செயல்பாட்டையும் மக்கள் சீர்தூக்கி பார்க்க வேண்டும்.

இது மன்மோகன்சிங் அரசு அல்ல. சோனியா காந்தியின் அரசு. மன்மோகன்சிங்கிடம் பொறுப்பு இருக்கிறது. ஆனால் அதிகாரம் கிடையாது. ஆனால் சோனியாகாந்தியிடம் அதிகாரம் இருக்கிறது. பொறுப்பு இல்லை. எனவே இந்த இரண்டு ஆட்சிகளையும் மக்கள் எடை போட்டு பார்க்க வேண்டும்.

பாஜக, காங்கிரஸ் இல்லாமல் எந்த அரசும் உருப்பட முடியாது. இருதுருவ அரசியல் நிலையில்தான் மத்திய அரசு உள்ளது. எனவே மூன்றாவது அணிக்கு வாய்ப்பே இல்லை. காங்கிரஸ் அரசின் மோசமான செயல்பாட்டால் விலைவாசி உயர்ந்துள்ளது.

நமது கவலை!

ஒரு குட்டையில் ஊறின மட்டைகளைவிட(அது துர்நாற்றம் எடுத்து நாளாகிவிட்டது), ஊறாத மட்டை(பா.ச.க) பின்னப்படுகிறதா? அல்லது நிறைச்சல் (கவர் பண்ணி ஏமாற்றுகிறார்களா?)பிடிக்கப் படுகிறதா? இவருடைய கூற்றை நம்பலாமா? இவர் ஆட்சிக்கு வந்தால் வெளியுறவுக் கொள்கையில் மாற்றம் ஏற்படுமா? இதற்கெல்லாம் காலம் தான் பதில் சொல்லவேண்டும்.