உலகத் தமிழ் செம்மொழி மாநாடு - இருட்டடிப்பின் உச்சம்

உலகத்தமிழ் செம்மொழி மாநாடு எதற்கு இப்பொழுது திணிக்கப்பட்டிருக்கிறது என்பது பெரும்பாலானவர்களுக்குத் தெரிந்திருப்பினும், சிலருக்குத் தெரியாமல் இருக்கலாம். அது தவறும் அல்ல. 2008-ம் ஆண்டு இறுதியிலிருந்து 2009 மே 18 வரை தமிழ் நாட்டை உள்ளடக்கிய இந்திய துணைக்கண்டத்தின் ஆதரவுடன் ஆங்கே ஈழத்திலே விடுதலை வேட்கைக்கு தாற்காலிக கொள்ளி வைக்கப்பட்டிருப்பதை அனைவரும் அறிந்திருக்கிறோம். அப்பொழுது கொஞ்சம் கவலைப்பட்டாலும், அதைப்பற்றி நாம் பெரிதாக எடுத்துக்கொள்வதில்லை. அடுத்தப் படம் வெளியீடு காணும் போது அதை மறந்து விடுகிறோம். அதன் பிறகு அந்த படத்துக்கான விமர்சனத்தை யார் எப்படி எழுதியிருக்கிறார்கள் என்று பார்ப்பதற்கே நமக்கு நேரம் போதுமானதாக இல்லை.

ஏறத்தாழ எண்பதாயிரம்(தமிழக முதல்வரின் கூற்றுப்படி) அப்பாவி மக்களை இலங்கையில் முள்வேலி வதை முகாம்களில் இன்னும் அடைத்து வைத்திருக்கின்றனர். இளைஞர்களை தனியாக பிடித்துக் கொண்டுபோய் துன்புறுத்துதல், இளம் பெண்களை பாலியல் வல்லுறவு செய்தல், கர்ப்பிணிப்பெண்களின் கருவைக் கலைத்தல் போன்ற இழி செயல்களை சிங்களர்கள் செய்வது நமக்குத் தெரிய ஞாயமில்லை. ஏன் என்றால் நம் தமிழ்கத்து ஊடகங்களில் இதுபோன்ற செய்திகள் வருவதில்லை அல்லது இருட்டடிப்பு செய்யப்படுகின்றன. அதற்கு பெரிய காரணங்கள் ஒன்றும் இல்லை. ஊடகங்கள், ஒன்று ஆளும் பணக்கார வர்க்கத்திடம் இருக்கின்றன. அவர்கள் இழைத்த துரோகத்தால் விளைந்த அவலத்தை அவர்கள் வெளிச்சம் போட்டுக் காட்டத் தயாரில்லை. இரண்டாவதாக ஈழத்தில் நடந்த விடுதலைப்போரை கீழறுப்பு செய்துகொண்ட்டிருக்கும் தி கிந்து,தினமணி(இண்டியன் எக்ஸ்பிரஸ்), தினமலர் உள்ளிட்ட ஆரிய ஊடகங்கள். இவர்கள் ஒருபோதும் ஈழப்போராட்டத்தை ஆதரித்து எழுதமாட்டார்கள். ஈழ மக்களின் அவலங்களை, மறுக்கப்படும் உரிமைகளை ஒரு போதும் வெளிச்சத்துக்கு கொண்டுவர விரும்பியதில்லை. மாறாக இருட்டடிப்பு செய்வதிலும், செய்திகளைத் திரிப்பதிலும் வல்லவர்கள். இவர்களது நம்பிக்கை சிங்களர்கள் ஆரியர்வம்சம் என்கிற எண்ணமாகக் கூட இருக்கலாம். அதற்குள் போக நான் விரும்பவில்லை.

இந்தளவுக்கு இருட்டடிப்பு செய்யப்பட்ட இனப்படுகொலை, மனித உரிமை மீறல்களை தமிழகத்தைச் சேர்ந்த ஒரு சில தமிழ் இன உணர்வாளர்கள் என்று சொல்லிக்கொள்ளும் அரசியல்வாதிகள் அவ்வப்போது மேடைகள் போட்டு ஆவேசமாக பேசுவதோடு வேறெதுவும் உருப்படியாக செய்ததில்லை. இவர்களை இந்திய ஆளும் வர்க்கமோ,தமிழகத்தை ஆளும் முதலாளிகளோ ஒரு பொருட்டாக மதித்ததாக ஞாபகம் இல்லை. ஏனென்றால் இவர்களிடம் ஓட்டு வங்கியும் இல்லை, வங்கிக்கணக்கில் போதுமான பணமும் இல்லை. இதையும் தாண்டி செய்த பாவத்தைக் கழுவ, ஒரு கண் துடைப்பு நாடகமாக தமிழகத்தைச் சார்ந்த நாடாளுமன்ற உறுப்பினர்களை இலங்கைக்கு அனுப்பி வதைமுகாம்களை பார்வையிட்டுவிட்டு, இலங்கை அதிபரைச் சந்தித்து வர அனுப்பிவைத்தார் தமிழக முதல்வர் கருணாநிதி. டி.ஆர்.பாலு தலைமையில் இங்கிருந்து சென்ற குழுவில் கவிதாயினி கனிமொழி, தொல்.திருமாவளவன் உள்ளிட்டோர் அடக்கம். இதில் வதை முகாம்களை பார்த்தவர்களில் தொல்.திருமாவளவனைத் தவிர யாருக்கும் கண்ணீர் வரவில்லை. இந்த சூழ்நிலையில், இலங்கையில் வவுனியா மாவட்ட கலெக்டரான ஒரு தமிழ்ப் பெண்மணியிடம் தனது கோபத்தைக் காட்டி மிரட்டிய குழுவின் தலைவர் டி.ஆர் பாலு அவரையும் கண்ணீர் விட வைத்திருக்கிறார். இதற்காகவா இவர்கள் அங்கு அனுப்பப்பட்டார்கள்? அந்த பெண்மணி இலங்கை அரசாங்கத்துக்கு ஆதரவாக செயல்படுகிறார் என்று குற்றம் சாட்டியிருக்கிறார். அவர் இலங்கை அரசாங்கத்தின் கீழ் வேலை செய்யும் அதிகாரி மட்டுமே, தமிழர் என்கிற உணர்வு கொஞ்சமாவது இல்லாமலிருக்காது. ஆக, தமிழர்களின் கண்ணீர் துடைக்க அனுப்பப்பட்ட குழு இன்னொரு தமிழரைக் கண்ணீர் விட வைத்திருக்கிறது. இதே மிரட்டலை அவர்கள் சந்தித்த டக்ளஸ் தேவானந்தாவிடமும், சந்திக்காத கருணாவிடம் காட்டியிருந்தால் நியாயமாக இருந்திருக்கும்.

ஆனால் நீங்கள் மகிந்த ராசபக்‌ஷேயிடம் பல்லிளித்து, பசிலிடமும், நோத்தாபய ராசபக்சயிடமும் கொஞ்சிக் குழாவினீர்களே அவர்கள் உங்களுக்கு என்ன உறவு? அவர்கள் ஒட்டுமொத்த இனத்தையும் அழித்த ஒழுக்க சீலர்களா? மனிதத்தை சவக்குழிக்கு அனுப்பிய சண்டாளர்களாயிற்றே! அவர்கள் உங்களை மதித்து வழங்கிய பரிசு பொருட்களான டிபன் பாக்ஸ்களையும், சோப்புப் பெட்டிகளையும் கொண்டு வரும் போது நன்றிக்கடனாக வதை முகாம்கள் சிறப்பாக இயங்குகின்றன என்றீர்கள்!

வந்தவுடன் திருமா பத்திரிக்கையாளரை சந்திக்க இருந்த நேரத்தில், விமான நிலையத்துக்கு வந்து அவரது வாயை பொத்தி அழைத்துச் சென்றது இருட்டடிப்பல்லவா? அதற்கு பின் அங்கு வதை முகாம்களில் இருக்கும் கல்லூரி மாணவர்களுக்கு பாடம் நடத்தத் சென்ற பேராசிரிய நண்பர் சொல்வது நீங்கள் சொல்வது போல் இல்லையே ஏன்? அங்குள்ள மக்கள் உளவியல் ரீதியாக பாதிக்கப்பட்டிருப்பதாக அல்லவா சொல்கிறார்கள்! நீங்கள் நான்கே நாளில் இலங்கைத்தமிழர்களுக்கு விடுதலை பெற்றுத்தந்ததாக போஸ்டர் அடித்து ஒட்டி சிற்றின்பம் அல்லவா கொண்டீர்கள்.

அனைத்துலக அரங்கில் இலங்கை அரசுக்கு லாபி செய்து எல்லா ஒத்துழைப்பும் வழங்கும் இந்திய அரசுக்கு நிபந்தனையற்ற ஆதரவு வேறு வழங்குகிறீர்கள்.
இவை எல்லாவற்றிற்கும் காரணகர்த்தாவான சோனியா காந்தி, மன்மோகன் சிங் ஆகியோரின் ஆசியுடன் குடியரசு தலைவரை அழைத்து உலகத் தமிழ் செம்மொழி மாநாடு என்கிற பெயரில் மாநாடு திணிக்கப்படவேண்டிய அவசியம் என்ன?
நான்கு முறை முதலமைச்சராக இருந்தபோது மாநாடு நடத்தும் எண்ணம் வரவில்லை. பேரறிஞர் அண்ணா அவர்களுக்கு ஈராண்டுக்குள் வந்த எண்ணம் இவ்வளவு காலம் கழித்து வந்ததற்கு ஏதேனும் காரணம் இருக்க வேண்டும்.

இதை இவர்களைக் கொண்டு செய்தால் அதை செல்லாக்காசாக்க முடியும் என்பது ஒரு வகையான சாணக்கியம் என்கிற பொதுபுத்தியுண்டு. அந்த வகையில், மார்க்சிய சிந்தனையுடைய ஈழத்து பொரிம்பிட்ட(Brand) இலக்கியவாதி திரு. கா.சிவத்தம்பி அவர்களைப் பிடித்திருக்கிறீர்கள். அவரை புடலங்காயில் கல் கட்டி இறக்கியது போன்று விருந்துக்கு தயார் செய்துவிட்டீர்கள். அவர் சுய விருப்பத்தோடு கலந்து கொள்கிறாரா என்கிற ஆராய்ச்சிக்கு செல்ல விரும்பவில்லை. விரும்பியவர்கள் போகட்டும். வேண்டா வெறுப்பாக ஏன் போகவேண்டும் என்பது பொதுவான கேள்வியாக இருக்கும்.

எப்படி இருந்தாலும் ஈழமக்களை, தமிழகத்தில், மலேசியாவில்,சிங்கையில் இன்ன பிற நாடுகளில் வசிக்கும் இன உணர்வாளர்களை, தமிழ் உணர்வாளரகளை அவமதித்து நடக்கும் இந்த உலகத் தமிழ் செம்மொழி மாநாடு என்று பெயரிடப்பட்ட கருணாநிதியைத் துதிபாடும் ஓணாண்டி கவிஞர்களும், கலைஞர் டிவி ஊழியர்களும், திமுகவினரும்,அக்கட்சியின் கூட்டணிக் கட்சியினரும் மட்டுமே பங்கு பெறும் உலகத் தமிழ் ஆராய்ச்சிக் கழகத்தின் அனுமதியில்லாமல் நடாத்தப்படுகிற மாநாட்டில் நான் இயற்கையாகவே இல்லை என்பதைத் தெரிவித்துக் கொள்கிறேன். இதை படிக்கும் நீங்கள் இருக்கிறீர்களா என்பதை உங்கள் முடிவுக்கே விட்டுவிடுகிறேன்!





இது பற்றி திரு. கோவி.கண்ணன் எழுதிய பதிவு,

செம்மொழி மாநாடு - எழவு வீட்டில் கறிவிருந்து !