காங்கிரசுக்கு உயிர் கொடுக்க திருநாவுக்கரசர்

சு.திருநாவுக்கரசர், தமிழக அரசியலில் ஒரு சில திருப்புமுனைகள் ஏற்படுவதற்கு முக்கிய காரணகர்த்தாவாக இருந்தார் என்றால் அது மிகையாகாது. 1977 -முதல் அதிமுக சட்டமன்ற உறுப்பினராக இருந்து தனது தொகுதிக்கு(அறந்தாங்கி) சிறப்பாகப் பணியாற்றி நல்ல பெயர் எடுத்திருக்கும் ஓர் அபூர்வமான அரசியல்வாதி என்றே சொல்லலாம்.

1977 -முதல் முறையே துணை சபாநாயகர், மாநில தொழில் அமைச்சர், உணவு அமைச்சர், எதிர்க்கட்சித் துணைத்தலைவர், புதுக்கோட்டை நாடாளுமன்றத் தொகுதி எம்.பி, மத்திய தொலை தொடர்புத் துறை இணை அமைச்சர், ராஜ்யசபை உறுப்பினர் என்று பல்வேறு பொறுப்புகளில் இருந்து திறமப்பட பணியாற்றியவர். இவர் மீது சில விமர்சனங்களும் உண்டு. அதையும் தாண்டி ஓரளவிற்கு நல்ல அரசியல்வாதி என்று பெயரெடுத்துக் கொண்டிருப்பவர்.

எம்.ஜி.ஆர் இளைஞர் அணித் தலைவர் பதவி எம்.ஜி.ஆரால் வழங்கப்பட்டு பணியாற்றினார். எம்.ஜி.ஆர் மறைவிற்குப் பின்னர் இரண்டாம் இடத்தில் இருந்த நாவலர் இரா.நெடுஞ்செழியனை முதல்வர் பதவிக்கு வரவிடக்கூடாது என்கிற நோக்கத்திலும், ஜானகி எம்.ஜி.ஆர் முதல்வராக வந்தால் தான் நினைத்தை நடத்தலாம் என்கிற நோக்கத்திலும் திரு.இராம.வீரப்பன் அவர்கள் எம்.எல்.ஏக்களை ஜானகிக்கு ஆதரவாக வைட்டமின் சி யுடன் கடத்திய போது திரு. திருநாவுக்கரசு அவர்கள் ஜெயலலிதாவுக்கு ஆதரவாக எம்.எல்.ஏக்களை தடுத்துவைத்துத் தக்கவைத்துக் கொண்டிருந்தார். அப்போது திருநாவுக்கரசரோடு தோளோடு தோள் நின்று உறுதுணையாக இருந்தவர் தற்போதைய அமைச்சர் சாத்தூர் இராமச்சந்திரன் என்பதை அனைவரும் அறிவர். இவர்கள் இருவரையும் அப்போது இரட்டையர்கள் என்று அழைப்பார்கள்.

பெரும்பான்மையான வைட்டமின் சி மாத்திரைகளை இராம வீரப்பன் கோஷ்டி வைத்திருந்ததால் பெரும்பான்மையான எம்.எல்.ஏக்களை மயங்க வைக்க முடிந்தது. வீரப்பன் கோஷ்டியும் ஜெயலலிதா கோஷ்டியும் வைட்டமின் சி மாத்திரை பெட்டியோடு மோதியதால் திராவிட இயக்கத்தின் மூத்த தலைவர் நடமாடும் பல்கலைக்கழகம் டாக்டர் நாவலர் இரா.நெடுஞ்செழியன் அணி அடையாளம் தெரியாமல் போய் ஜெயலலிதா கோஷ்டியுடன் சேர்ந்து கொள்ளும் அவல நிலைக்கு ஆளானது அனைவருக்கும் தெரியும்.

அண்ணாவிற்கு அடுத்த இடத்தில் இருந்த நாவலர், கருணாநிதிக்கு அடுத்த இடத்தில் இருந்த நாவலர், எம்.ஜி.ஆருக்கு அடுத்த இடத்தில் இருந்த நாவலர், இறுதியாக ஜெயலலிதாவிற்கு அடுத்த இடத்தில் இருக்கும் நிலைக்கு ஆளானார். அவருக்கு திமுகவில் சேரும் எண்ணம் ஒரு போதும் வந்ததில்லை. அதற்கு பல காரணங்கள் உண்டு.

ஜெயலலிதா அரசியலுக்கு வந்த காலத்தில் அவரை பகிரங்கமாக எதிர்த்து, அதனால் எம்.ஜி.ஆரிடமே பகைத்துக் கொண்டு அதிமுகவை விட்டு வெளியேறி நமது கழகம் என்ற கட்சியை ஆரம்பித்த எஸ்.டி.எஸ்,மற்றும் பண்ருட்டி எஸ்.இராமச்சந்திரன் உள்ளிட்ட திராவிட இயக்கத்தின் மூத்த தலைவர்கள் ஜெயலலிதாவின் தலைமையை ஏற்று அவருக்காக தமிழகமெங்கும் ஆதரவு திரட்டினார்கள்.

இந்த சூழ்நிலையில் கே.எ.கிருஷ்ணசாமி,க.இராசாராம்,ப.உ.சண்முகம் உள்ளிட்ட திராவிட இயக்கத்தின் மூத்த தலைவர்கள் ஜானகி அம்மாளுக்கு உறுதுணையாக இருந்து அவரை முதலமைச்சராக்கி மகிழ்ந்தார்கள். ஒரு மாதம் கூட நீடிக்க விடாமல் ஜானகி அம்மையாரின் ஆட்சியை முதுகில் குத்தி வீட்டுக்கு அனுப்பிய பெருமை அப்போதைய காங்கிரஸ் பேரியக்கத்தையே சாரும்.

இந்த நிலையில் திருநாவுக்கரசர், சாத்தூர் இராமச்சந்திரன் உள்ளிட்ட அப்போதைய இளம் தலைவர்கள் ஜெயலலிதாவை தமிழகம் எங்கும் அழைத்துச் சென்று கூட்டங்கள் போட்டு பிற்காலத்தில் தமிழகத்திற்கு ஜெயலலிதா முதல்வராக ஒரு காரணமாக அமைந்து விட்டார்கள் . ஆனால் ஜெயலலிதா முதல்வராகும் தருணத்தில் திரு. திருநாவுக்கரசர் அவர்களை அதிமுகவை விட்டு நீக்கியிருந்தார் என்பது குறிப்பிடத்தக்கது.

ராஜ்ய சபையில் ஈழத் தமிழர்களுக்காக, இலங்கையில் மீறப்படும் மனித உரிமைகளுக்காக குரல் கொடுக்கும் தமிழகத் தலைவர்களுள் முக்கியமானவர் திரு.திருநாவுக்கரசர். இன்று ஈழத்தமிழர்களின் படுகொலையையும், அவர்கள் மீதான மனித உரிமை மீறலையும் திட்டமிட்டு நிறைவேற்றிவிட்டு, அதாவது இதை நிகழ்த்த சிங்கள அரசுக்கு எல்லா வகையிலும் உடந்தையாய் இருந்து உதவிகள் செய்துவிட்டு, மூன்று இலட்சம் ஈழத் தமிழர்களை முள்கம்பி வேலிக்குள் அடைத்து வைத்து, வீடு,வாசல், சொத்து, நில புலன்களை இழந்து நிற்கதியாக நிற்க வைத்து ஒன்றும் தெரியாத பாப்பா மாதிரி வேடிக்கை பார்க்கும் இந்திய தேசிய காங்கிரசில் சேரப்போகிறார் என்கிற செய்தி வேதனை அளித்தாலும், இவரை வைத்து தமிழகத்தில் பிழைப்பு நடத்தத் துடிக்கும் காங்கிரஸ், ஏன் எம் தமிழர்களுக்கு நல்ல பொழுது விடியவிட்டு பிழைப்பை தொடரக்கூடாது அல்லது மாறு வேடம் போட்டு பிழைப்பு நடத்துவதற்கு பதிலாக வேறு ஏதும் செய்து பிழைத்தால் என்ன?

காங்கிரஸ்காரர்களின் அழைப்பை ஏற்று திரு திருநாவுக்கரசர் காங்கிரசில் சேர்ந்தால், அவரும் சராசரி அரசியல் பிழைப்புவாதிகளின் வரிசையில் சேர்ந்து கொள்கிறார் என்பது திண்ணம்.